學生專區

生活中經常遇到不少挑戰,如果懂得觀察身邊事物、分析及運用數碼科技解決困難,便能裝備自己迎接未來的數碼時代。 齊來學習編程,提升運算思維。
小朋友,是時候踏出數碼時代的第一步!

學生專區

生活中經常遇到不少挑戰,如果懂得觀察身邊事物、分析及運用數碼科技解決困難,便能裝備自己迎接未來的數碼時代。 齊來學習編程,提升運算思維。

小朋友,是時候踏出數碼時代的第一步!

靈感一觸

英皇書院同學會小學
陶則然|陳凱權|葉柏言

要做個精明消費者,梗係要喺購買前格價同對比同類型產品嘅資料,英皇書院同學會小學嘅陶則然、陳凱權同葉柏言同學就製作咗「評貨可區」APP,幫助用家更方便了解產品嘅資訊。

「評貨可區」係一個產品資料意見交流平台,用戶上戴相片後就會搵到產品資料及其他用戶嘅評價,自己都可以給予意見同心得,除咗用相片搜尋更方便省時之餘,呢個APP仲可以減少用家購物之後對貨品失望,甚至造成浪費嘅情況。

優才(楊殷有娣)書院
楊柏浩|陳卓穎

依家好多學校都增加額外人手,檢查同學進入校院時有無戴口罩,保障大家安全。來自優才(楊殷有娣)書院嘅楊柏浩同陳卓穎同學就發明咗「A.I.學校防疫檢測站」,協助學校減省檢查時間和人手!

「A.I.學校防疫檢測站」可以設置課室前,同學在進人課室時經過檢測站,A.I.系統就會透過鏡頭辨認同學有無戴口罩,戴咗就會出現「Ok, Passed」訊息;相反,無戴嘅話就會發出警告訊息,提醒同學戴返口罩先可以入課室。

透過製作檢測站,同學仔學識訓練A.I.模型去辨識戴口罩前後嘅樣貌,再將A.I.模型同Scratch連接運作,真係好叻呀!

油蔴地天主教小學
鄭棨哲|蔡卓恆|鄭棨晞

相信大家都好了解情緒健康嘅重要性,油蔴地天主教小學嘅同學仔:鄭棨哲、蔡卓恆、鄭棨晞就留意到疫情期間為身邊家人朋友帶來不少壓力,所以就製作咗「身心靈520」App去幫大家紓緩情緒!

用家使用前會先回答一份「心靈問卷調查」,讓AI分析身心靈健康狀態後,然後程式會提出建議,讓用家使用7大功能檢視生活方式、疏解壓力,包括計步器、計算卡路里與AI聊天等,更可以透過遊戲及完成任務獲取積分,解鎖「心靈獎賞」!

同學仔喺設計程式嘅時候,更參考咗香港中文大學近年推廣嘅「7好大法」,令程式可以更全面幫助身心靈健康!

中華基督教會基灣小學(愛蝶灣)
鄭昕悅|何駿謙|郭澄朗

長者記憶力較差,患病後常常會因忘記食藥,影響治療進度!中華基督教會基灣小學(愛蝶灣)嘅3位同學仔:鄭昕悅、何駿謙、郭澄朗就製作咗「『快康服』智能藥箱」,提醒長者按時服藥,仲加上小機關幫用家紓緩情緒。

「『快康服』智能藥箱」 會以唔同音樂提醒用家夠鐘食藥。按時食藥、合上藥箱之後,藥箱更會顯示一則笑話,氹用家開心,並為下次食藥時間再次計時。

同學們除咗著重藥箱功能,更細心設計佢嘅外觀,做到好似百寶箱咁,令用家無咁抗拒食藥,加快復原!你又鍾唔鍾意同學們呢個作品呢?

中華基督教會協和小學
洪浚禧|劉子曜|鍾旻諾

香港有唔少人養鸚鵡作為寵物,不過部分主人因為要返工,無時間帶佢哋出街,令需要照射陽光嘅鸚鵡好易病!中華基督教會協和小學嘅3位同學仔:洪浚禧、劉子曜、鍾旻諾就為鸚鵡們製作咗「愛心Pet Pet燈」,等佢哋喺屋企都可以享受陽光!

「愛心Pet Pet燈」係一個可以遠距離控制燈光嘅APP,配合藍牙同LED燈模組,只要利用手機就可以隨時隨地調較籠內燈光,讓鸚鵡吸收足夠紫外線維持健康!

青衣商會小學
屈家緯|屈家嶸|陳家培

普遍老師都身兼多職:教書、處理行政事務、聯絡家長等等,未必可以時刻看管課室內所有學生。青衣商會小學嘅3位同學仔:屈家緯、屈家嶸、陳家培就製作咗「學校交互系統」,希望減少學生因擅離班房而發生危險嘅機會⚠,減輕老師嘅負擔!

「學校交互系統」運用咗Micro:bit感應器,一塊戴喺同學嘅手帶上,另一塊就安裝喺班房。遇上有同學離開班房,系統就會通知老師,減少意外發生嘅機會!

同學們喺製作過程中需要處理唔少程式相容性嘅問題,佢哋積極搜集資料,在組員間互相配合,最終成功完成作品!

你又諗唔諗到其他可以幫輕老師工作嘅裝置呢?

荃灣商會學校
王世平|曾燁曦|巫鑑軒

學習中文字對非華語學生嚟講非常困難,荃灣商會學校 since 1986嘅3位同學仔:王世平、曾燁曦、巫鑑軒就發明咗一個名為「『非』常識字遊戲」嘅手機遊戲App去幫非華語學生,以拆字口訣形式學寫中文字!

遊戲玩法好簡單,首先玩家會接觸到21個由筆劃演化而來嘅中文「字母」,之後遊戲會跳出一個個中文字,要求玩家根據筆劃,順序排出中文「字母」,答對就可以得分!與此同時,遊戲配合圖像與聲音,讓玩家可以學埋讀音同字義,一舉三得!

同學們可以設身處地,了解社會上不同人士嘅困難,再施予援手,真係非常值得大家學習!

馬鞍山靈糧小學
李梓維|郭哲仁|謝易辰

唔知大家做運動前有無做足熱身呢?來自馬鞍山靈糧小學嘅3位同學仔:李梓維、郭哲仁、謝易辰就發明咗「運動小伙伴」裝置,幫大家正確進行熱身運動!

人體進行熱身之後,平均心跳同體溫都會出現變化,「運動小伙伴」利用了這個原理,透過感應器檢測佩戴者呢2項數據,仲設有計時功能,咁就可以評估佩戴者是否做夠熱身,從而減低運動時嘅受傷機會!

同學仔為咗檢測裝置嘅準確性,更設計咗一個比對測試,確保80%以上使用者用咗「運動小伙伴」後可以正確完成熱身運動,想法非常周到!

英皇書院同學會小學第二校
周希澄|利芷穎|于心盈

為咗鼓勵大家多啲外出運動, 英皇書院同學會小學第二校(官方專頁)嘅3位同學仔:周希澄、利芷穎、于心盈開發咗「奔FUN樂」App,利用遊戲鼓勵市民增加外出到公園同行山徑等郊外地方,舒展身心,鍛鍊體魄!

「奔FUN樂」App將香港公園、行山徑等不同地點設定為checkpoint,當玩家到達checkpoint並完成指定任務後,就可獲得分數。同學們為咗增加遊戲趣味性同耐玩性,更加入咗分數兌換系統,賺夠分數仲可以喺遊戲內換取唔同嘅角色造型同襟章添!

天水圍循道衞理小學
林天朗|伍柏錡|黃恩諾

長者行動不便,喺無交通燈嘅情況之下過馬路,經常驚險百出⚠!天水圍循道衞理小學嘅3位同學仔:林天朗、伍柏錡、黃恩諾就設計咗一個「長者萬事通」安全島過路裝置,希望減少意外!

「長者萬事通」係一個連接顯示屏嘅腳踏板裝置,可以放喺過路處,當長者過馬路時踩過踏板,就會觸發踏板內嘅感應器,在遠處嘅顯示屏顯示「請停下」,及早提示駕駛者停車。當長者踩過馬路另一端嘅腳踏,顯示屏嘅訊息就會轉為「可行駛」,提示駕駛者可以繼續行駛。

同學們仲打算下一步可以善用人面辨識系統,唔駛淨係依靠腳踏裝置,令過程更準確快捷,考慮得非常周到!

大埔舊墟公立學校
文光耀|蘇梓翹|李澤曦

環保回收概念已經喺香港推行多年,但部分長者仍未有足夠嘅環保意識同埋分類知識。來自 Tai Po Old Market Public School 大埔舊墟公立學校 嘅文光耀、蘇梓翹、李澤曦就發明咗一個小遊戲,讓長者邊玩邊學環保概念,更同時鍛鍊反應同身體協調能力!

呢個名為「環保舊墟KEEP FIT GOAL」嘅遊戲分為2個部分,第1個係同健康有關嘅射擊遊戲,玩家要利用滑鼠將營養價值低嘅食物擊落,賺取健康分數,教導玩家減少食用垃圾食物;而第2個部分係同環保有關嘅分類遊戲,玩家要將唔同類型嘅垃圾放到相應嘅回收箱內🗑,從而加強環保意識!

3位同學仔喺開始設計呢個遊戲之前,專登向長者們發放問卷,了解佢哋對學習環保概念嘅意向,同埋操作電腦及手機嘅熟練程度,先至開發出呢個貼合佢哋需要嘅程式,非常有心思!

佛教林炳炎紀念學校
吳嘉怡|梁海殷|陳夏媺

相信唔少新手父母都經歷過BB半夜踢被子嘅煩惱,佛教林炳炎紀念學校嘅3位同學仔:吳嘉怡、梁海殷、陳夏媺就留意到呢個問題,設計咗「寶寶睡眠體溫感測被子」APP幫父母監測BB棉被內嘅溫度 ,從而減少BB生病嘅機會!

呢個App嘅使用方法好簡單,只要將一個溫度感應器放到BB被內,當溫度過高或過低,就會發送信號去室內接收器,再經過互聯網發送提示到父母嘅手機 。父母亦可於App內睇到各種數據,例如踢被時間、溫度等,讓父母作出相應嘅行動。

同學仔寫好App之後更有實際投入使用,不斷改善作品嘅效果,非常認真!